Samarqand viloyati hokimi o‘rinbosari Xurshidbek Samiyev “China Long Teng International Development” MChJ XK vakillari bilan uchrashuv o‘tkazdi.

Uchrashuv davomida kompaniya tomonidan Kattaqo‘rg‘on tumanidagi “Yakkabog‘” kichik sanoat zonasida zamonaviy qurilish mahsulotlarini ishlab chiqarish loyihasini amalga oshirish masalalari muhokama qilindi.

Muhokamalar davomida Sanoat zonalarini boshqarish direksiyasi direktori D. Xabibullayev tomonidan kichik sanoat zonasidagi mavjud bo‘sh yer maydonlari va ularning imkoniyatlari to‘g‘risida taqdimot o‘tkazildi.

Shuningdek, uchrashuvda tadbirkorlarga loyihani kengaytirish va qo‘shimcha ishlab chiqarish quvvatlarini tashkil etish maqsadida auksion savdolariga chiqarilgan bo‘sh yer maydonlari bo‘yicha mavjud takliflar taqdim etildi.

Tomonlar loyihani o‘z vaqtida va sifatli amalga oshirish, ishlab chiqarish quvvatlarini ishga tushirish hamda yangi ish o‘rinlarini yaratish borasidagi hamkorlikni davom ettirishga kelishib oldilar.